Beyoncé ka ndezur spekulimet se mund të jetë gati të largohet nga Shtetet e Bashkuara, pasi së fundmi është parë duke vizituar një pronë të madhe në zonën piktoreske të Cotswolds në Angli, në shoqërinë e bashkëshortit të saj, reperit të njohur Jay-Z.
Këngëtarja 43-vjeçare, e cila ka përfunduar së fundmi koncertet madhështore të “Cowboy Carter” në Londër, thuhet se ka fluturuar me helikopter për të parë nga afër një tokë prej 58 hektarësh në Oxfordshire, një zonë që njihet për privatësinë, qetësinë dhe jetën luksoze larg kaosit të qytetit.
Burime për The Oxford Mail bëjnë me dije se çifti vizitoi pronën midis koncerteve të Beyoncé në Londër, duke bërë një ndalesë të shkurtër në aeroportin lokal Enstone Airfield. Interesi i tyre për këtë vend nuk është rastësor. Prona ndodhet pranë shtëpive të miqve të tyre të afërt si Ellen DeGeneres dhe Portia de Rossi, ndërsa fqinjë të mundshëm mund të jenë emra të njohur si Simon Cowell, familja Beckham, Kate Moss dhe Jeremy Clarkson. Edhe Calvin Harris është duke ndërtuar një kompleks rural luksoz aty, pas blerjes së disa vilave në këtë rajon.
Megjithëse çifti nuk ka komentuar zyrtarisht për këtë vizitë, ajo vjen në një moment të veçantë politik për SHBA. Beyoncé ka qenë një nga figurat e famshme që mbështeti haptazi Kamala Harris në zgjedhjet presidenciale.
Tani që Donald Trump është rikthyer në Shtëpinë e Bardhë, atmosfera politike në Amerikë është përkeqësuar për shumë artistë liberalë, dhe Beyoncé nuk është e vetmja që po mendon të zhvendoset jashtë vendit.
Nuk është hera e parë që figurat e showbiz-it amerikan e kanë përmendur ose ndërmarrë realisht largimin nga SHBA pas fitores së Trump. Emra si Cher, Whoopi Goldberg, Madonna dhe më herët edhe Johnny Depp kanë deklaruar në mënyrë simbolike ose serioze dëshirën për t’u larguar.
Në këtë klimë, lëvizja e Beyoncé drejt një vendbanimi të mundshëm në Mbretërinë e Bashkuar shihet jo vetëm si një zgjedhje jetese, por edhe si një mesazh i heshtur politik, një largim i qetë nga një Amerikë që nuk përfaqëson më bindjet e saj.
