Tre emrat më të kërkuar për kryetar të kësaj partie: Vlora Çitaku, Memli Krasniqi dhe Gent Cakaj, e që nëse zgjidhet cilido prej tyre, pritet të bëhet një reformim i thellë i kësaj partie, shkruan “Kosovarja”.
Vetëm tre individë në PDK-në aktuale mund ta bëjnë reformimin e kësaj partie: Vlora Çitaku, Memli Krasniqi dhe Gent Cakaj.
Për më shumë, kjo parti duhet të pastrohet nga anëtarësia që e ka mbajtur të kapur PDK-në vite e vite…
Nuk është SHIK-u rreziku i degradimit të PDK-së, e as nuk ka qenë, por është krimi ekonomik të cilin e kanë mbajtur dhe, mjerisht, e mbajnë akoma disa individë të lartë të PDK-së.
Pa dyshim, Vlora Çitaku është emri më domethënës i PDK-së nëse vjen në krye të kësaj partie. Ajo ka krijuar imazh ndërkombëtar. Puna e saj ambasadore e Kosovës në SHBA, ka bërë që të pajiset me një bagazh politik si askush tjetër, duke krijuar simpati në popull, në tërësi, por edhe te elektorati i PDK-së, në veçanti.
Raportimet me fakte të Vlora Çitakut në KS të OKB-së çdo tre muaj, në sesionet e rregullta për Kosovën, e kanë tronditur Serbinë…
Por, edhe Memli Krasniqi, po ashtu, është një personalitet që ka evoluuar më së shumti në PDK, duke qenë shumë përmbajtësor në çdo debat e diskutim.
Një emër tjetër i brezit të ri, e që mund ta merr kreun e PDK-së, është edhe Gent Cakaj, aftësitë e të cilit opinioni i ka parë gjatë mandatit zyrtar në krye të politikës së jashtme të Shqipërisë.
Sidoqoftë, cilido prej tyre që do e fitojë të parin e PDK-së, nuk do e qojë reformimin e kësaj partie deri në fund, pa bërë pastrim të disa individëve në këtë parti – kapës të kriminalitetit ekonomik.
Ka deputetë të cilët PDK-në e kanë patos prej nga i marrin votat elektorale për ta ruajtur kapitalin e fituar në forma të ndryshme…
E, PDK-ja i di mirë kush janë ata që i kanë vënë hije te keqe kësaj partie… Safet Krivaça /Kosovarja/