Artistja e njohur shqiptare Dafina Zeqiri ka shprehur publikisht mbështetjen e saj për grupin Shkodra Elektronike, të cilët këtë vit përfaqësojnë Shqipërinë në Festivalin Evropian të Këngës, Eurovision Song Contest 2025.
Përmes një postimi në InstaStory, Dafina ka shpërndarë një video të performancës së grupit, duke shoqëruar atë me fjalët: “Të martën, jemi gati”, në shenjë mbështetjeje dhe entuziazmi për daljen e tyre në skenën e madhe.
Grupi Shkodra Elektronike do të performojë në natën e parë gjysmëfinale të Eurovisionit, e cila do të zhvillohet më 13 maj.
Ata përfaqësojnë Shqipërinë me këngën “Zjerm”, një krijim muzikor që ka tërhequr vëmendjen dhe ka fituar popullaritet të konsiderueshëm në rrjetet sociale për qasjen e saj unike, stilin modern dhe energjinë karakteristike.
Kënga “Zjerm” është vlerësuar për kombinimin e elementeve elektronike me motive tradicionale shqiptare, duke sjellë një identitet të veçantë në skenën ndërkombëtare të Eurovisionit.
Pritshmëritë për Shqipërinë këtë vit janë të larta, sipas platformave të basteve dhe reagimeve të shumta nga publiku dhe kritikët e huaj.
