Deputetja britanike, Alicia Kearns, e cila është edhe kryetare e Komisionit për Punë të Jashtme, gjatë një debati në Parlament, lidhur me çështjen e Ballkanit Perëndimor, ka folur edhe për Kosovën.
Në një video që ka shpërndarë edhe në rrjetin social Twitter, ka thënë se ndjehet më e lehtësuar ndërsa Qeveria e Mbretërisë së Bashkuar, ka konfirmuar se nuk e mbështetë krijimin e enklavës serbe në Kosovë përmes Asociacionit.
Ajo shtoi se për Britaninë është e rëndësishme të mos rrënjoset më tej etno-nacionalizmi në Ballkan.
“Shumë e lehtësuar kur dëgjova Qeverinë të konfirmojë se nuk do të mbështesë krijimin e një enklavë serbe në Kosovë. E rëndësishme është që ne të mos e rrënjosim më tej etno-nacionalizmin në Ballkan”, shkroi Keans.
Po ashtu Kearns ka pyetur gjatë seancës qeveritarët nëse e kanë kundërshtuar këtë ide të krijimit të një Republika Srpska të re dhe nëse do të bllokohet Republika Srpska që të manovrojë në bursën e Londrës, duke thënë se me këtë po i financon planet e ambiciet që ka për t’u shkëputur nga territori i Bosnjë-Hercegovinës.
Ndërkaq, më herët, gjatë të martës, ambasadori Nicholas Abbott, ka thënë se Kosova është vend multietnik dhe komunat e saj do të mbeten multietnike.
Tutje ka shtuar se nuk bëhet fjalë për krijimin e një enklave monoetnike.
“Një organ i tillë nuk është vetëm një angazhim ndërkombëtar, por gjithashtu ofron një mundësi për serbët e Kosovës që të jenë pjesë integrale e Kosovës. Kosova është një vend multietnik dhe komunat e saj do të mbeten multietnike. Nuk bëhet fjalë për krijimin e një enklavë monoetnike”, ka shkruar Abbott në Twitter.
Çështja e Asociacionit, u diskutua edhe në Ambasadën e SHBA-së në Prishtinë.
Ambasadori Jeff Hovenier tha gjatë ditës se SHBA-ja e ka bërë të qartë tashmë se nuk mbështet asnjë marrëveshje që shkel Kushtetutën e Kosovës ose që kërcënon sovranitetin, pavarësinë dhe karakterin multietnik të saj.
“Ne kundërshtojmë rreptësisht krijimin e një entiteti që i ngjan Republikës Sërpska në Bosnje dhe Hercegovinë”, deklaroi Hovenier.
Very relieved to hear the Government confirm that they will not support the creation of a Serb-enclave in Kosovo.
Crucial we do not further entrench ethno-nationalism in the Balkans. pic.twitter.com/RytJaWfAMb
— Alicia Kearns MP (@aliciakearns) January 31, 2023