Debati i hapur nga Ilir Vrenozi për një përplasje me Armir Shahinin, apo Mirin e West Side Family, pas finales së “Big Brother VIP 5” ka vijuar të ngjallë diskutime, duke sjellë reagime edhe nga ish-banorë të tjerë të edicionit.
Sipas deklaratës së Vrenozit, konflikti mes tyre ka nisur pas finales së madhe të reality show-t, ku ai është shprehur i zhgënjyer pasi nuk është përmendur si fitues nga Shahini. Më tej, ai ka pretenduar se përplasjet kanë vijuar edhe pas përfundimit të programit, duke përmendur edhe një episod ku, sipas tij, është kërcënuar me fjalët “do të të zhduk”.
Lidhur me këto deklarata, në rubrikën “Trotuar” në emisionin “E Diell”, ditën e djeshme, janë pyetur dy ish-banorë të “BBV 5”, Seno Fishta dhe Armir Tola, të cilët kanë dhënë versionin e tyre mbi situatën.
Seno u shpreh se situata mund të ketë lindur nga keqkuptime dhe reagime emocionale në moment, duke theksuar se komunikimi mes palëve ka qenë i ngarkuar dhe me tension.
Ndërkohë, Armir Tola ka deklaruar se ka folur me të dy palët dhe e ka konsideruar çështjen të mbyllur në thelb, duke e përshkruar si një situatë momentale që nuk pritet të përshkallëzojë më tej.
“Është çështje momentale, nuk do të ndodhë asgjë,” është shprehur ai, duke shtuar me një ton më të prerë se, në rast se ka ende tensione, ai do të ndërhyjë për të shmangur përshkallëzimin e situatës.
Mbetet për t’u parë nëse kjo deklaratë do të sjellë qetësim mes palëve apo do të hapë diskutime të reja në vijim.
