Florian Dushi : Prishtina- kryeqendra e të gjitha lëvizjeve kombetare për liri dhe pavarësi

Sot, në Ditën e Çlirimit të Prishtinës, kujtojmë me nderim dhe mirënjohje rrugëtimin e gjatë të popullit tonë drejt lirisë.
Prishtina, historikisht, nuk ishte vetëm kryeqyteti i Kosovës. Ajo ishte kryeqendra e të gjitha lëvizjeve kombëtare për liri dhe pavarësi, qendra politike, diplomatike dhe intelektuale e rezistencës sonë kombëtare. Nga ky qytet u artikulua dhe u udhëhoq lëvizja kombëtare për liri, pavarësi dhe demokraci, e prirë nga Presidenti Rugova dhe Lidhja Demokratike e Kosovës, duke e shndërruar çështjen e Kosovës në një kauzë të drejtë të njohur dhe të mbështetur nga bota demokratike.
Lufta çlirimtare e Ushtrisë Çlirimtare të Kosovës, sakrifica e dëshmorëve dhe martirëve të kombit, si dhe ndërhyrja vendimtare e NATO kundër regjimit serb, bënë të mundur që Prishtina dhe e gjithë Kosova të fitojnë lirinë që gëzojmë edhe sot.
Kjo ditë na kujton se liria nuk ishte dhuratë, por rezultat i vizionit, qëndresës, sakrificës dhe aleancave të fuqishme të kombit me botën demokratike.
Lavdi të gjithë atyre që kontribuuan për lirinë e Kosovës!
Nderim i përhershëm për dëshmorët, martirët dhe të gjithë veprimtarët e lirisë!