Gjermania, Franca, Italia dhe disa shtete të tjera evropiane njoftuan se do ta rinisin përdorimin e vaksinës së kompanisë “AstraZeneca” për Covidin-19 pasi rregullatorët e BE-së dhe Britanisë njoftuan se kjo vaksinë është e sigurt dhe efektive.
Raportet për disa raste të mpiksjes së gjakut shkaktuan shqetësime dhe disa shtete morën vendimin për pezullimin e përdorimit të kësaj vaksine, duke shkaktuar goditje të rëndë ndaj fushatës së vaksinimit në kontinent.
Sidoqoftë, Agjencia Evropiane e Ilaçeve, më saktësisht drejtoresha e kësaj agjencie, Emer Cooke, tha: “Kjo është një vaksinë e sigurt dhe efektive. Po të varej nga unë, do të vaksinohesha nesër”, shkruan Reutersi.
Disa orë pas kësaj deklarate, Gjermania njoftoi se do ta rinisë përdorimin e vaksinës “AstraZeneca” nga mëngjesi i së premtes.
Edhe Franca tha se do ta vazhdojë përdorimin e vaksinës. Kryeministri i këtij shteti, Jean Castez, tha se do ta marrë edhe vetë vaksinën të premten pasdite.
Kryeministri i Italisë, Mario Draghi, tha se edhe vendi i tij do ta bëjë të njëjtën gjë dhe se mbetet prioritet i Qeverisë së tij që të vaksinojë sa më shumë njerëz që është e mundur dhe që ky proces të kryhet sa më shpejt.
Të njëjtin vendim e morën edhe Qiproja, Letonia dhe Lituania, ndërsa Spanja, Portugalia dhe Holanda njoftuan se do ta rifillojnë përdorimin e vaksinës “AstraZeneca” nga java e ardhshme.