Forca e Sigurisë së Kosovës (FSK) ka konfirmuar gjetjen e trupit të pajetë të një 33-vjeçari në Liqenin e Ujmanit, pas një operacioni kërkim-shpëtimi të zhvilluar në bashkëpunim me institucionet vendore dhe partnerët ndërkombëtarë.
“Pas ftesës së Qendrës së Situatave të Qeverisë së Republikës së Kosovës, dhe koordinimeve me partnerët për angazhimin e Ekipeve të FSK-së, Komandanti i FSK-së Gjenerallejtënant Bashkim Jashari ka urdhëruar ekipet e Kërkim Shpëtimit në Ujëra, për realizimin e operacionin humanitar në kërkim të personit të raportuar si i zhdukur. Me pranimin e urdhrit, ekipet e FSK kanë marrë të gjitha masat dhe në koordinim me partnerët ndërkombëtarë dhe qendror janë angazhuar në operacion e kërkimit të personit të zhdukur”, thuhet në njoftimin e FSK-së.
Sipas këtij institucioni, falë intensitetit të lartë të kërkimit dhe profesionalizmit të ekipeve në terren, pas disa orësh kërkimi, në bashkëpunim me Policinë e Kosovës, Agjencinë për Menaxhim Emergjent dhe KFOR-in, është arritur të lokalizohet dhe të gjendet trupi i pajetë i viktimës në zonën e liqenit të Ujmanit.
“Pas evakuimit, trupi i pajetë i viktimës i është dorëzuar Policisë së Kosovës dhe ekipit të Forenzikës për procedurat e mëtejme”, thekson Ushtria.
