Në vendin tonë, jo rrallë herë raportohet për raste të vdekjeve, ku persona të moshave të ndryshme gjenden pa shenja jete në shtëpitë e tyre, apo apartamentet ku jetojnë. E këto raste bëhen akoma më të rënda, kur viktimat vdekja i gjenë pa asnjë person pranë vetes, pasi kanë jetuar të vetëm.
Një rast i tillë është raportuar mëngjesin e sotëm në qytetin e Gjilanit, ku një burrë është gjetur pa shenja jete në banesën e tij.
Burime të Gazetës Sinjali bëjnë me dije se rasti ka ndodhur më 3 qershor 2025, rreth orës 07:20, në rrugën “Isa Kastrati”, ku është gjetur i pajetë një 71-vjeçar.
Sipas burimeve, viktima jetonte i vetëm, pasi anëtarët e familjes së tij ndodheshin me punë të përkohshme në Perëndim. Ai ishte nën kujdesin e vazhdueshëm të një familjareje, e cila jetonte pranë dhe sot kishte tentuar ta kontaktojë me telefon. Kur nuk kishte marrë përgjigje, kishte shkuar në shtëpinë e tij dhe e kishte gjetur të shtrirë në korridor, pa shenja jete.
Menjëherë është njoftuar Policia dhe Qendra Emergjente, ndërsa mjekët kanë konstatuar vdekjen në vendngjarje.
Në vendin e ngjarjes kanë dalë njësitet hetimore dhe krimteknika, të cilët kanë kryer ekzaminimet fillestare, ndërsa me urdhër të Prokurorit Kujdestar të Prokurorisë Themelore në Gjilan, trupi i pajetë është dërguar në Institutin e Mjekësisë Ligjore në Prishtinë për autopsi.
Rasti është cilësuar si “vdekje e dyshimtë”, dhe hetimet po vazhdojnë për të sqaruar rrethanat e sakta të ngjarjes.
