Ikona e luftës për arsimimin e femrës shqiptare në Kosovë dhe Mal të Zi, Naxhije Alibegu Buçinca është shpallur Qytetare Nderi e Qytetit të Ulqinit.
E ky nderim për zonjën Alibegu Buçinca u bë në një ditë të veçantë për vendlindjen e saj, të shtunën në ditën e festës së Komunës së Ulqinit, e cila shënon fillimin e sezonit turistik.
Me këtë rast u dha edhe një program i pasur artistik
Gruaja e cila për 65 vjet sa kontribuoi në arsim, çdo ditë ia kushtoi shkollimit të femrës shqiptare, mirënjohjen e pranoi shoqëruar me stërmbesën e saj, Poem Blu.
Ajo edhe sot vazhdon të bëjë thirrje për arsimin e gruas, e një gjë të tillë e bëri edhe pas pranimit të mirënjohjes.
“Prej të mirave njerëzore që posedon njeriu është arsimimi, e sidomos arsimimi i gruas”, tha Naxhije Alibegu Buçinca.
Për të shpallur Qytetare Nderi e Qytetit të Ulqinit, Naxhije Alibegu Buçinca u propozua nga Shoqata “Ulqini’ me seli në New York, shoqata e “Anamalit dhe Krajës” në New York si dhe nga shoqata “Anima” me seli në Ulqin.
Në këtë eveniment po ashtu folën: Kryetar i Kuvendit të Komunës së Ulqinit Ardian Mavriqi, Kryetari i Komunës së Ulqinit, Omer Bajraktari, e kryetari i Malit të zi Jakov Milatoviq.
