Grupi për Studime Juridike dhe Politike (GLPS) ka theksuar se dështimi për të formuar institucionet shtetërore për dy muaj radhazi ka pasur ndikim negativ në të gjitha aspektet e qeverisjes, me fokus të veçantë në procesin e integrimit evropian.
Kjo organizatë ka paralajmëruar se që nga viti i kaluar nuk është ndërmarrë asnjë veprim për ratifikimin e Agjendës së Reformave, e cila mund të sjellë përfitime prej 883 milionë eurosh për Kosovën për një periudhë trevjeçare.
GLPS ka kërkuar krijimin sa më të shpejtë të institucioneve dhe ratifikimin dhe zbatimin e menjëhershëm të Marrëveshjes së Planit të Rritjes. Sipas tyre, çdo vonesë ose zvarritje, veçanërisht pas qershorit, do të shkaktonte dëm të madh ekonomik, duke rrezikuar humbjen e mundësisë për të përfituar qindra miliona euro, dhe do të kishte pasoja të rënda dhe të pariparueshme për të ardhmen e Kosovës.
“Kosova, për shkak të pamundësisë për hapjen e negociatave për anëtarësim, duhet të përqendrohet në Agjendën e Reformave, e cila është miratuar nga Komisioni Evropian në tetor 2024 dhe është dorëzuar për ratifikim në Kuvend më 4 dhjetor. Kjo Agjendë përfshin reforma të rëndësishme që i afrojnë Kosovën me standardet e Bashkimit Evropian dhe gjithashtu ofron mbështetje financiare për këto reforma. Megjithatë, që nga ajo kohë, nuk është ndërmarrë asnjë hap për ratifikimin e kësaj marrëveshjeje të rëndësishme”, thuhet në komunikatën e GLPS.
Gjithashtu, GLPS theksoi se është një përgjegjësi e rëndësishme politike që të mos humbet mundësia për heqjen e masave ndëshkuese nga Bashkimi Evropian.
“Situata rëndohet edhe më shumë kur merren parasysh pasojat e një mosratifikimi deri në qershor, afati i dytë i zbatimit të reformave, ku rrezikohet kthimi në fazën e parë të negociatave. Kjo mund të rezultojë në vonesa në përdorimin e fondeve dhe mundësinë që ato fonde të shpërndahen drejt shteteve të tjera të Ballkanit Perëndimor, pasi Plani i Rritjes i BE-së përmban klauzola të konkurrencës, që mund të çojnë në rishpërndarje të fondeve për ata që e realizojnë më shpejt reformën.”, thuhet tutje.
