Videoja që është bërë virale prej javësh dhe që po qarkullon në rrjetet sociale, ku është filmuar një vajzë në kanionin e Tijesnos në Bosnje dhe Hercegovinë duke qëndruar mbi kapakun e motorit të një veture në lëvizje, ka arritur edhe në duart e policisë në Banjallukë që po mundohet të përcaktojë rrethanat e rastit.
Një vajzë e panjohur kishte vendosur që përmes kanionit të Vërbasit, të kaloj mbi kapakun e motorit të një veture.
Videoja është bërë virale dhe tregon bashkudhëtarin që filmon kanionin e Vërbasit, kur në një moment nga kahja e kundërt sheh një veturë që në anën e majtë të kapakut të motorit qëndronte një femër e veshur me fustan.
E siç raportojnë mediat boshnjake, këtij veprimi i kishte paraprirë një grindje e çiftit, e vajza kishte vendosur të ngjitet mbi veturë derisa partneri i saj tentonte të largohej nga ajo.
