Një ngjarje tronditëse ka ndodhur në orët e para të mëngjesit të 27 majit në Lipjan. Një grua ka raportuar në polici se është dhunuar seksualisht nën kërcënimin e një thike, mëson Sinjali nga burimet e veta brenda hetuesisë.
Sipas kallëzimit të viktimës, ngjarja ka ndodhur me 27 maj, rreth orës 05:00 në rrugën “Mbretëresha Teutë” në Lipjan, ku ajo pretendon se është sulmuar nga A.S., i cili dyshohet se ka kryer aktin e dhunës në prani të bashkëjetuesit të saj Xh.Z., i cili është intervistuar në cilësinë e dëshmitarit.
Pas raportimit, rasti është trajtuar nga njësia rajonale e hetimeve, e cila ka ndërmarrë menjëherë veprimet procedurale, duke intervistuar të dyshuarin dhe duke dërguar viktimën për ekzaminim gjinekologjik. Pas kësaj, në rast është përfshirë edhe Prokurori për Krime të Rënda, i cili ka udhëhequr procedurën.
Rasti është iniciuar si “Dhunim”, ndërsa përkundër natyrës së rëndë të kallëzimit, i dyshuari është liruar në procedurë të rregullt.
Hetimet janë ende në fazë fillestare, ndërsa organet e drejtësisë pritet të përcaktojnë me saktësi përgjegjësinë penale dhe të gjitha rrethanat që rrethojnë këtë ngjarje të rëndë.
Sinjali do të vijojë të raportojë për çdo zhvillim të ri.
