Sot në Kosovë do të mbajë mot kryesisht i vranët dhe ende i ngrohtë për këtë periudhë kohore. Në mëngjes mund të ketë edhe ndonjë interval kohor me diell. Gjatë ditës priten vranësira të dendura të cilat do të fillojnë të kushtëzojnë edhe reshje shiu. Pasdite dhe në mbrëmje përkeqësim i madh i motit me erëra të fuqishme jugore dhe reshje shiu. Në Dukagjin me theks të veçantë pasdite vonë dhe në mbrëmje priten reshje të dendura shiu. Fuqia maksimale e erërave jugore do të jetë afërsisht nga 50 deri në 90 km/h. Erërat më të fuqishme priten në veri, verilindje, veriperëndim, jug në të gjitha viset kodrinore-malore.
Në Shqipëri sot pritet mot jashtëzakonisht i paqëndrueshëm, pasdite dhe në mbrëmje me përkeqësim dramatik të motit. Priten reshje të fuqishme shiu, erëra majft të fuqishme jugore, rrebeshe intensive shiu me vetëtima dhe bubullimë. Reshje jashtëzakonisht të fuqishme nesër priten edhe në Mal të Zi.
Në Maqedoninë Veriore sot gjatë ditës kryesisht pa reshje me ndonjë rigë lokale. Pasdite ose në mbrëmje vonë priten reshje shiu. Në perëndim dhe veriperëndim priten reshje intensive shiu.
Të hënën pas një qetësimi të përkohshëm të motit pasdite dhe në mbrëmje përsëri pritet afrimi i ciklonit tjetër të fuqishëm me reshje intensive shiu e bore. Në Kosovë ka shumë gjasa që reshjet e shiut të shndërrohen në reshje të dendura bore, por jo në krejt territorin vetëm në disa vende.
Të martën depërtim i ajrit të ftohtë polar. Erërat do të ndryshojnë drejtim dhe do të fillojnë të fryjnë nga veriu dhe verilindja. Vende-vende dhe herë pas here do të ketë edhe reshje bore.
Reshjet e dy ditëve të ardhshme do të jenë mjaft intensive në Shqipëri ku priten edhe përmbytje. Reshje intensive do të ketë edhe në shumë pjesë të Dukagjinit ku nuk përjashtohet po ashtu mundësia e përmbytjeve të shpejta./Meteoballkan
