Kryetari i PDK-së, Kadri Veseli, thotë se moslejimi i fluturimeve nga aeroporti i Prishtinës, është absurd dhe shqetësues.
Përmes një shkrimi në Facebook, Veseli thotë se diaspora vjen nga vendet që e kanë menaxhuar mirë pandeminë dhe se ata nuk mund të vuajnë nga paaftësia e menaxhimit të pandemisë si dhe ‘nuk janë fajtorët për këtë’.
Shkrimi i plotë i Veselit në FB:
Moslejimi i fluturimeve në Aeroportin e Prishtinës sa është absurd, është po aq edhe shqetësues për diasporën tonë, por edhe për të gjithë ne.
Masat dhe rekomandimet e institucioneve shëndetësore duhet të respektohen, por edhe nevoja e bashkëatdhetarëve tanë që të vizitojnë vendin e tyre duhet të jetë prioritet dhe nuk duhet e as nuk bën të cenohet nga asnjëri prej nesh.
U bëj thirrje autoriteteve vendimmarrëse që menjëherë të reflektojnë, t’i krijojnë kushtet që diaspora jonë të gëzojnë të drejtën e ardhjes në Kosovë përmes linjave ajrore. Ata vijnë nga vende që e menaxhojnë mirë pandeminë.
Diaspora nuk mund të vuajnë nga paaftësia e menaxhimit të pandemisë, ata nuk janë fajtorët për këtë.