Deputetja e LDK-së, Rrezarta Krasniqi i ka reaguar ministrit të Infrastrukturës, Liburn Aliu, i cili dje njoftoi se është publikuar njoftimi specifik për prokurim për shërbimet konsulente për rishikim të dizajnit dhe mbikëqyrjen e punëve ndërtimore në “rrugën N2 Prishtinë – Mitrovicë, me gjatësi 9.78 km”.
Sipas ministrit Aliu, shërbimet do të mbulojnë një periudhë prej njëzet e pesë muaj kalendarik nga data e fillimit ku përfshihen “tre muaj shqyrtimin e dizajnit, përgatitjen e dosjes së tenderit, procedurat e prokurimit dhe vlerësimin e ofertave, 20 muaj periudha e mbikëqyrjes se punimeve dhe dy muaj periudha e finalizimit të projektit”.
Për këtë çështje, deputetja opozitare e pyeti Aliun se ia ka “qitur lapsin, që për dy vjet punime të flet për 9.78km rrugë”.
Ajo e pyeti po ashtu ministrin Aliu se çfarë do të bëhet me autostradat e tjera në Kosovë.
“Mirëmëngjes ministër Liburn Aliu Allahile qysh ja qite lapsin, 2 vjet punime në 9.78km rrugë? E me autostradat tjera çka do me bo, a kur do me i kry? A mos të duhet edhe një mandat tjetër për me i shtru 20km asfallt? #Qeveripërfaqetëzezë”, shkroi ajo në Facebook.
