Në një periudhë kur gastronomia zvicerane po përjetonte ndoshta goditjen më të madhe për të dekadave të fundit për shkak të pandemisë, një familje shqiptare në Frenkendorf të Baselland-it zgjodhi të mos ndalet. Përkundrazi, zgjodhi të fillojë.
Mark dhe Kristina Krasniqi sot përmenden si shembull i një sipërmarrjeje të ndërtuar me guxim, disiplinë dhe vizion të qartë. Por rruga e tyre nuk nisi në kohë stabiliteti. Më 3 gusht 2020, në kulmin e pandemisë globale, kur shumë restorante po mbyllnin dyert dhe pasiguria ishte pjesë e përditshmërisë, ata hapën Mark’s Restaurant, restorantin e tyre të parë.
Ishte një vendim që kërkonte më shumë se kapital. Kërkonte besim në vetvete, përvojë profesionale dhe bindjen se cilësia dhe korrektësia nuk dalin kurrë nga moda.
Që nga dita e parë, Mark’s Restaurant u pozicionua qartë në treg: një menu premium urbane, e ndërtuar mbi produkte të freskëta, mish zviceran të kualitetit të lartë dhe përgatitje të çdo pjate në moment. Asgjë industriale, asgjë e improvizuar. Një çasje e sinqertë ndaj kuzhinës, që sot shihet si arsyeja kryesore pse klientët rikthehen vazhdimisht.
Me kalimin e kohës, restoranti u shndërrua në një adresë të njohur jo vetëm për adhuruesit e gastronomisë cilësore, por edhe për organizimin e darkave dhe festave ekskluzive. Në ambientin elegant dhe mikpritës të Mark’s Restaurant janë pritur figura të njohura nga Zvicra, si dhe personalitete eminente nga Kosova dhe Shqipëria. Festa të kuruara deri në detaj, menu të personalizuara dhe vera të përzgjedhura me kujdes, elemente që e kanë ngritur përvojën në një nivel tjetër.
Një nga asetet më të veçanta të këtij biznesi familjar është Goldin Saal, sallë elegante me kapacitet deri në 80 persona, e dedikuar për organizimin e martesave, fejesave, ditëlindjeve, festave familjare dhe eventeve të veçanta.
Për Markun dhe Kristinën, çdo event trajtohet si unik. Kujdesi për detajet, komunikimi i drejtpërdrejtë me klientin dhe përfshirja emocionale janë pjesë e pandashme e filozofisë së tyre të punës.
Mark’s Restaurant ofron edhe organizim eventesh eksterne. Nga menuja premium dhe dekorimi i sallave, deri te koordinimi i plotë i eventit, gjithçka realizohet aty ku klienti dëshiron, me të njëjtin standard profesional.
Sot, Mark’s Restaurant nuk është thjesht një biznes i suksesshëm gastronomik në Frenkendorf. Është dëshmi se edhe në kohët më të vështira, kur shumë heqin dorë, ka nga ata që ndërtojnë. Është historia e një familjeje që besoi në punë të ndershme, në kualitet dhe në respekt ndaj klientit dhe i qëndroi besnike këtyre parimeve.
