Kryetari i Aleancës Kosova e Re (AKR), Behgjet Pacolli, ka kërkuar nga kryeministri Albin Kurti që të jetë i kujdesshëm në raport me ndërkombëtarët. Duke përmendur rastin e pronave te Manastiri i Deçanit, Pacolli tha se Qeveria duhet t’i përfundojë obligimet e saj pa bërë show.
Ish-zëvendëskryeministri i Kosovës u shpreeh i bindur se implementimi i obligimeve e nxjerr Kosovën dinjitetshëm nga dialogu.
Kreu i AKR-së konsideron se vonesat në implementimin e Asociacionit janë humbje kohe për Kosovën. Ai tha se këto vonesa po shkaktojnë presion e dëm ndaj vendit.
“Unë do ta rekomandoja Qeverinë e Kosovës të jetë e kujdesshme nëse e ka ndërmend të implementojë diçka, siç ka ndodh me Deçanin, ta bëj atë pa polemika, pa hyrë në këtë në situata të palakmueshme, e që e vënë Kosovën në situatë që është tani në relacion me ndërkombëtaret, dhe unë besoj Qeveria duhet ta di vetë çka duhet të bëjë dhe nëse është ndonjë obligim që ka ndërmend ta bëj, ta bëj menjëherë e jo mbas një show që po më duket është i panevojshëm, dhe çdo refuzim i implementimit të Asociacionit gjithmonë po e them limitet e kushtetutës së Kosovës është një humbje kohe edhe për ne, edhe për Kosovën se po e shihni kur Kosova nuk implementon diçka, atëherë koha zgjatet e presioni gjithmonë është i vazhdueshëm mbi Kosovën. Dhe krejt ky presion që bëhet me një shtet të vogël, në një shtet aq të dijshëm si Kosova nuk është mirë”, thotë Pacolli.
Pacolli pati kritika edhe për mundësinë e “fshehjes” së pranimit të Asociacionit nga ana e Qeverisë. Tha se implementimin e Asociacionit të komunave me shumicë serbe nuk e pengon askush.
“Unë besoj që Qeveria ka vendosur për këtë dhe Qeveria do ta bëjë këtë Qeveria është prapë pa kurrfarë nevoje duke kërkuar si të ia lë emrin Asociacionit. Do të bëhet se Qeveria e di këtë dhe është mirë që zoti Kurti të vijë ta informojë parlamentin për veprimet e tij dhe ta bëjë atë. Unë nuk besoj që dikush e barikadon, dikush e pengon z. Kurti në implementimin e marrëveshjeve gjegjësisht obligimeve që janë aty, mirëpo Kurti barrikadohet dhe kritikohet edhe bojkotohet në parlament nëse ai pa kurrfarë paralajmërimi, pa kurrfarë diskutimi, pa e diskutuar me opozitën bën veprime. I bën veprimet tani vjen edhe arsyetohet”, tha tutje ai.
Ish-zëvendëskryeministri beson se me implementimin e Asociacionit mund të përfundojë saga e dialogut me Serbinë. Shpreh bindjem se implementimi i këtyre obligimeve, e nxjerr Kosovën dinjitetshëm nga Dialogu.
“Unë nuk besoj që tani do të ndodh një ndonjë mrekulli por sigurisht do t’i bëjnë presion Kosovës që të implementojë disa obligime të cilat janë aty si p.sh ajo që ndodhi në Deçan sigurisht edhe për Asociacionin, dhe me implementimin e këtyre obligimeve, do të thotë Kosova është e përgatitur për ta kry edhe dialogun të dinjitetshëm”, u shpreh Pacolli.
