Dosjet sekrete që po lihen në zyrën e Organizatës së Veteranëve të UCK-së, kanë hapur shumë dyshime dhe paqartësi rreth shumë temave dhe problemeve.
Por, ajo që dihet fillimisht, para se të themelohej Gjykata Speciale, ishte preferencë e bashkësisë ndërkombëtare, që një gjykatë që do të formohej enkas për krimet e luftës në Kosovë, do ta pastronte luftën e UCK-së dhe vetë UCK-në.
Kaq ishte ideja që vinte nga ofensiva politiko-juridike e bllokut Serbo-Rus, të cilës i dha formë dhe përmbajtje senatori zviceran në Parlamentin Evropian Dik Marti.
Por , çka në fakt ndodhi ?
A ishte tradhti formimi i Gjykatës Speciale?
Në Kosovën e pasluftës ishte misioni i OKB-së – UNMIK që e nisi legjislaturën dhe juridiksionin e vet në Kosovë. De fakto, UNMIK-u, ishte zot shtëpie në Kosovë.
Askush nuk e kishte thënë dikur, kur ishte koha më e mirë për kapjen e kriminelëve të luftës kushdo që të ketë qenë ai, se në Kosovë duhet formuar një gjykatë vendore për vlerësimin, gjykimin, apo dënimin e krimeve të pretenduara të UCK-së .
Ishin dy gjëra fondamentale që kjo të mos ndodhte dhe të mos kërkohej:
Edhe po ta kërkonin shqiptarët një gjykatë të tillë, UNMIK-u zor që do ta lejonte, sepse duhej të merrej direktiva nga KS i OKB-së, bazuar në raportimet e sesioneve të rregullta në KS, që bëheshin nga UNMIK-u dhe Serbia.
Liderët politikë të Kosovës, ishin vetëm kukulla.
Dhe dy, fakti se, dhuna serbe kishte qenë aq barbare në Kosovë, sa ishte jologjike të kërkohej gjykatë vendore për dënimin e krimeve mbi serbët.
Sikur të kishte ndodhur një gjë e tillë në fillim pas lufte, populli këtu, do ta kallte edhe një luftë, meqë dihej kush ishte agresori që shkaktoi masakrat më të tmerreshme në historinë njerëzore të krimit, si Reçaku, Likoshani, Gallapi, Gjakova, Rahoveci, Krusha e Madhe dhe Krusha e Vogël, Izbica, Suhareka e shumë të tjera.
Tani Kosovën e qortojnë pse nuk e kishte themeluar vet një gjykatë për dënimin e krimeve të pretenduara, por nuk e thotë askush se Kosova zot shtëpie e kishte UNMIK-un .
Po kjo bashkësi ndërkombëtare që e ka çliruar Kosovën dhe shqiptarët nga shfarosja e Serbisë, sot po kërkon ta dënojë Kosovën që ishte vetëm viktimë dhe asgjë më shumë.
Çka ka ndodhur që këta njerëz që na çliruan, sot po na dënojnë?
Mbase e vërteta e ka vetëm një emër:
Dikush e ka tradhtuar Kosovën. /Safet Krivaca / Kosova /