Nëse po kërkoni të mësoni një nga ato sallata të cilat mund t’i merrni me lehtësi në punë dhe janë perfetke për tu konsumuar gjatë një pikniku, keni gjetur recetën e duhur.
Kjo sallatë është perfekte kur vezët dhe përbërësit e tjerë janë të freskëta.
E veçanta e saj qëndron në salcën që do të përgatisni me sallatën e ujit apo siç njihet ndryshe lakërishtë, lakër uji ose purqark.
Ndiqni më poshtë recetën e plotë dhe përgatiteni edhe ju për një vakt plot shije dhe vlera.
Përbërësit
6 kokrra vezë
1 tufë majdanoz
1 qepë
½ lugë speca djegës të thatë
70 g lakër uji ose lakërishtë
75 ml vaj ulliri
Përgatitja
Filloni duke zier vezët. Pas kësaj qërojini, pritini në gjysmë dhe lërini mënjanë.
Bashkoni në një mikser sallatën e ujit dhe vajin, duke i spërkatur me pak kripë për shije. Përpunojini dhe lërini mënjanë.
Gjithashtu, përzieni specin djegës të grirë me pak kripë dhe lërini edhe ato mënjanë.
Qëroni dhe prisni hollë qepën, e më pas lani mirë dhe copëtoni majdanozin.
Tani ju mbetet vetëm të bashkoni përbërësit në një enë të përshtatshme për servirje.
Nëse dëshironi që këtë sallatë ta merrni me vete në punë apo për një piknik, vendosini përbërësit në enë të veçanta dhe bashkojini përpara se t’i konsumoni.
