Dhjetë ditë pas përleshjes së armatosur në lagjen “Aktash” të Prishtinës midis familjes Sekiraqa dhe “Capave”, ku mbeti i vrarë Premtim Gashi, Policia e Kosovës ka arritur ta arrestojë edhe një të dyshuar.
I arrestuari i fundit, dyshohet se ka manipuluar provat e krimit, transmeton IndeksOnline.
Policia ka deklaruar se pas hetimeve intensive përkitazi me rastin, të mërkurën është vënë nën pranga, i dyshuari i gjashtë i përfshirë në këtë rast që tronditi lagjen “Aktash”.
“Lidhur me rastin ‘vrasje e rëndë në bashkëkryerje, armëmbajtje pa leje dhe shkaktim i rrezikut të përgjithshëm’ që ka ndodhur, më 1 shtator në orën 22:04 në rrugën “Gazmend Zajmi”, më 11.09.2024 është arrestuar i dyshuari mashkull kosovar, i cili dyshohet se ka kryer veprën penale manipulim me prova”, thuhet në njoftimin e fundit të policisë.
Pas intervistimit me vendim të prokurorit i dyshuari është dërguar në mbajtje, ndërsa hetimet në lidhje me rastin ende po vazhdojnë.
Numri i të arrestuarve për këtë rast ka shkuar në gjashtë, ndërsa ka ende persona që janë identifikuar e që ndodhen në arrati./IndeksOnline
