Ministri i Brendshëm Xhelal Sveçla ka përkujtuar sot në 17-vjetorin e vrasjes, zyrtarin policor Triumf Riza.
Sveçla ka thënë se e ka njohur personalisht policin Trium Riza, të cilin e ka vlerësuar lartë për përkushtimin për sundim të ligjit dhe luftim të pakompromis të krimit e bandave kriminale që vendi ynë u përball me vite, transmeton Zeri.info.
Shkrimi i plotë i Sveçlës:
17 vite më parë, në qendër të Prishtinës, me breshëri plumbash nga dora e grupeve kriminale të asaj kohe u vra zyrtari policor Triumf Riza.
Përveç që kam pasur mundësinë ta njoh personalisht Triumfin, të gjithë kolegët që kanë punuar me të e vlerësojnë lartë shërbimin e tij me vullnet e shumë përkushtim për sundim të ligjit e luftim të pakompromis të krimit e bandave kriminale që vendi ynë u përball me vite.
Jemi dëshmitarë se ende nuk është vendosur drejtësia e plotë me këtë rast, gjë që na obligon të gjithëve që të punojmë pandalshëm që ajo të ndodhë jo vetëm si shpagim për krimin e bërë por edhe si parandalim që kohërat e situatat e tilla të mos na përsëriten më.
