Kryeministri në largim, Albin Kurti, gjatë qeverisjes së tij, në dy raste ka vepruar siç ka thënë edhe Presidenti Hashim Thaçi. Por, nga inati nuk ka pranuar që proceset të zhvillohen sipas propozimit dhe idesë së Hashim Thaçit!
Në fillim të masave të pandemisë Covid-19, kur presidenti mblodhi Këshillin e Sigurisë Kombëtare dhe po atë natë doli me idenë për shpallje të gjendjes së jashtëzakonshme, e refuzoi kryeministri Kurti.
Por, Kurti, pa u bërë as 24 orë, mori masa izolimi, karantinimi dhe ndalesa të tjera, e që ishin të njëjta me masat e gjendjes së jashtëzakonshme!
Mirëpo, Kurti nuk i emëroi këto masa me emrin e gjendjes së jashtëzakonshme, siç veproi rajoni ynë, konkretisht Shqipëria, Maqedonia, Mali i Zi dhe Serbia.
Ai e injoroi kërkesën e presidentit, duke e bërë praktikisht të njëjtën gjë që e propozoi Thaçi.
Dhe, për këtë gjë, kryeministri e shkeli dy herë Kushtetutën, duke i izoluar në karantinë disa nga qytetet e vendit!
E, nëse do të ishte shpallur gjendje e jashtëzakonshme, kryeministrit nuk do t’i faturoheshin shkeljet kushtetuese, siç bëri Gjykata Kushtetuese e Kosovës.
Rasti i dytë, e që Albin Kurtin e përafron me Hashim Thaçin, është raporti me të emëruarin e BE-së për dialogun Kosovë-Serbi, Miroslav Lajçak.
Hashim Thaçi pat deklaruar se nuk ka vullnet të ulet për bisedime Kosovë-Serbi me Lajçakun. Ndërkaq, Albin Kurti ditë më parë pat folur në telefon me Lajçakun dhe i kishte thënë se Kosova është e gatshme për bisedime me Serbinë, ani pse Kushtetuta e vendit nuk i lejon bisedime si kryeministër i shkarkuar.
E, meqë Albin Kurti vendosi reciprocitet për mallrat serbe, që të faturohen me logo të Republikës së Kosovës, Lajçaku refuzoi reciprocitetin dhe i reagoi qeverisë Kurti që të hiqet reciprociteti menjëherë.
Andaj, kjo të jep të kuptosh se Albin Kurti tashmë do flasë njëjtë si Hashim Thaçi për të dërguarin e Borrelit për dialogun Kosovë-Serbi.
Thënë shkurt, Albin Kurti, gjatë kësaj faze qeverisjeje, ka kaluar nëpër të njëjtat gjëra që i ka thënë Hashim Thaçi, vetëm se Kurti nuk i ka emëruar njësoj si Thaçi!
Konkretisht, nëse Thaçi ka thënë se letra është e bardhë, Kurti ka thënë është e zezë! Nëse Thaçi ka thënë po bie shi, Kurti ka thënë po bie borë!
Dhe, të gjitha këto i bëri dhe po i bën për të mos u shprehur njëjtë si Thaçi, ani pse e di mirë se Thaçi gjithmonë ka të drejtë… Safet Krivaça /Kosovarja/
