Dhuna është shndërruar në makth për vajzat dhe gratë në vendin tonë. Ato përballen me dhunë sistematike në forma të ndryshme si psikike, fizike e seksuale. E të dyshuar në këto raste, zakonisht janë persona të afërm të tyre.
Një person ka përfunduar sot në pranga, pasi dyshohet se ka ushtruar dhunë ndaj një gruaje. Rastin e ka konfirmuar zëdhënësi i Policisë së Kosovës për Rajonin e Pejës, Fadil Gashi, i cili tha për Sinjalin se në pranga ka rënë edhe gruaja e cila ishte viktimë e dhunës.
Sipas Gashit, e dyshuara ka penguar zyrtarët policorë që shkuan të intervenojnë në rast në rrugën ‘UÇK’ te Parku i Madh në Karagaq.
“Sot rreth orës 17:45, Policia është njoftuar për një përleshje në rrugën “UÇK”te Parku i Madh në Karagaq. Njësitë policore kanë dalë në vendngjarje, kanë takuar dy persona duke u përleshur, një mashkull dhe një femër. I dyshuari është kapur duke ushtruar dhunë ndaj vajzës, teksa kjo e fundit ka penguar zyrtarët policorë të kryejnë detyrën e tyre. Dy të dyshuarit janë arrestuar dhe janë shoqëruar në stacion policor për intervistim. I dyshuari edhe në stacion policor ka kanosur verbalisht policët dhe me urdhër të prokurorit është dërguar në mbajtje për 48 orë, ndërsa e dyshuara është liruar në procedurë të rregullt”, tha Gashi.
Lexuesi kanë dërguar pamje nga vendi i ngjarjes, ku shihet momenti i arrestimit të të dyshuarit./Gazeta Sinjali
