Policia e Kosovës për rajonin e Ferizajt bën të ditur se sot në orët e mëngjesit e stacionit në Shtërpcë ka pranuar një informacion se në Brezovicë, rruga që shpie tek qendra e skijimit, dyshohet se persona të panjohur kanë vrarë një ari.
Zëdhënësi i Policisë për rajonin e Ferizajt, Kanun Veseli tha për Telegrafin se lidhur me rastin janë njoftuar edhe zyrtarët e Parkut Kombëtar “Sharri”.
“Sot, rreth orës 07:50 policia e stacionit në Shtërpcë ka pranuar një informacion se në Brezovicë, rruga që dërgon tek qendra e skijimit, dyshohet se persona të panjohur kanë vrarë një kafshë të egër (ari). Policia e rendit e më pas policët hetues i kanë marrë të masat e nevojshme kanë dalë në vendin e ngjarjes dhe po e hetojnë rastin”, tha ai.
Ndërsa me vendim të prokurorit kujdestar nga Prokuroria Themelore në Ferizaj, rasti është cilësuar “Gjueti e paligjshme” .
