Agjencia e Statistikave të Kosovës (ASK) ka publikuar të dhënat vjetore për lindjet gjatë vitit 2024, duke ofruar një pasqyrë të detajuar të natalitetit brenda dhe jashtë vendit.
Sipas raportit, gjatë vitit 2024 janë regjistruar gjithsej 31 717 lindje, ku përfshihen si lindjet brenda territorit të Kosovës, ashtu edhe ato të qytetarëve të Kosovës të ndodhura jashtë vendit.
Vetëm brenda Kosovës, numri i lindjeve të regjistruara ishte 21 487. Nga këto, 11 115 ishin foshnje meshkuj (ose 51,7%), ndërsa 10 372 ishin femra (ose 48,3%), duke treguar një përqindje të lehtë më të lartë të lindjes së djemve në raport me vajzat.
Të dhënat janë siguruar nga Agjencia e Regjistrit Civil të Kosovës, përkatësisht nga Zyrat e Gjendjeve Civile, të cilat janë përgjegjëse për regjistrimin zyrtar të lindjeve në të gjitha komunat e Kosovës.
