Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, që po shkaktojnë ankth e pasiguri, sidomos kur shtëpitë mbesin pa përkujdesje. E cak i hajnave shpeshherë janë edhe shtëpitë e mërgimtarëve, të cilat në Kosovë mbesin të mbyllura në shumicën e muajve të vitit.
Kështu e ka pësuar një shtëpi në fshatin Dardani në Ferizaj, pronari i së cilës jeton dhe vepron në Gjermani.
Burimet brenda Prokurorisë kanë bërë me dije se rasti është denoncuar nga familjari i pronarit, i cili ka pohuar se hajnat kanë vjedhur një veturë dhe disa pajisje elektronike të cilat kanë vlerë të madhe.
Bazuar në dëshminë e tij, vlera e dëmit kap shifrën e rreth 20 mijë eurove.
Njësitë policore kanë kryer në vendin e ngjarjes të gjitha ekzaminimet që ndihmojnë në zbardhjen e rrethanave të rastit dhe çojnë në identifikimin e personave të dyshuar.
Me urdhër të prokurorit, rasti është cilësuar ‘Vjedhje e rëndë’, teksa vazhdojnë hetimet për gjetjen e të dyshuarve dhe arrestimin e tyre.
