Kryetari i Partisë Demokratike të Kosovës (PDK), Memli Krasniqi, ka bërë të ditur se i është përgjigjur pozitivisht ftesës së kryetarit të koalicionit Vetëvendosje-Guxo-Alternativa, Albin Kurti, për një takim para seancës konstituive të Kuvendit të Kosovës që pritet të mbahet nesër.
Përmes një deklarate në Facebook, Krasniqi ka theksuar rëndësinë e zhbllokimit institucional dhe të rikthimit të funksionimit të rregullt të Kuvendit, duke thënë se një veprim i tillë është thelbësor për të hapur rrugën e formimit të Qeverisë së re në përputhje me afatet kushtetuese.
“Do t’i përgjigjem pozitivisht kësaj ftese për takim, duke besuar thellësisht se Republika e Kosovës ka nevojë urgjente për zhbllokim institucional”, ka deklaruar Krasniqi.
Ai ka inkurajuar Kurtin që të reflektojë me përgjegjësi mbi situatën aktuale politike dhe të shfaqë vullnet të sinqertë për formimin e institucioneve të reja, duke theksuar rëndësinë e gjetjes së një kandidati ose kandidateje që gëzon mbështetjen e shumicës së deputetëve.
Sa i përket çështjes së nënkryetarëve të Kuvendit, kreu i PDK-së ka qenë i qartë se kjo është një e drejtë e garantuar nga Kushtetuta dhe nuk lë vend për diskutime.
Krasniqi ka shtuar se PDK do të vazhdojë të veprojë me seriozitet dhe në përputhje me interesin shtetëror dhe qytetar. Ai ka paralajmëruar se qëndrimet e detajuara të partisë do të bëhen publike nesër përmes një konference për media, gjatë dhe pas takimit me Kurtin.
Ndërkaq, Lidhja Demokratike e Kosovës ka refuzuar ftesën e Kurtit.
Deputetja Hykmete Bajrami ka deklaruar se as kryetari Abdixhiku dhe asnjë përfaqësues tjetër i LDK-së nuk do të marrë pjesë në takim.
“Megjithatë, as kryetari Abdixhiku dhe askush nga Lidhja Demokratike e Kosovës nuk do të merr pjesë në këtë takim. Pozita e nënkryetarit të Kuvendit që i takon Lidhjes Demokratike të Kosovës është në bazë të rezultatit zgjedhor, dhe nuk është objekt diskutimi me asnjë parti tjetër. Për me tepër nënkryetarët votohen në pako nga Kuvendi, sipas praktikës së deritanishme”, ka thënë Bajrami.
