Qeveria e Kosovës ka mbajtur sot mbledhjen e radhës elektronike ku është marrë veç një vendim. Mbledhja duket se është mbajtur enkas për heqjen e ngjitësave/stikerave nga veturat me targa të Serbisë.
Kështu është njoftuar në faqen zyrtare të Kryeministrisë ku bëhet e ditur se vendimi i vetëm që është marrë sot ka të bëjë me targat serbe, shkruan Paparaci.com.
Sipas qeverisë, heqja e regjimit të stikerave është akt i fqinjësisë së mirë dhe vjen pasi Serbia njohu plotësisht targat e Kosovës.
“Qeveria e Republikës së Kosovës ka zhvilluar sot mbledhjen e radhës elektronike, në të cilën ka miratuar vendimin për largimin e regjimit të letër ngjitësve/stikerave për veturat me targa të Serbisë. Heqja e regjimit të letër ngjitësve/stikerave është akt i fqinjësisë së mirë dhe vjen pas njohjes së plotë të targave të Republikës së Kosovës nga Serbia.”, thotë qeveria.
Vlen të theksohet se nga 1 janari, veturat me targa RKS mund të qarkullojnë lirshëm në territorin e Serbisë.
Në anën tjetër, qeveria e Kosovës kishte marrë vendim kohë më parë që targave serbe që hyjnë në Kosovë t’u vendosen stikerë.
