Qeveria Kurti po akuzohet për punësime nepotiste. Informacionet për punësime dhe kapje të reja janë të përditshme, shkruan “Kosovarja”.

 

Ndryshimet nëpër borde dhe shkarkimet, janë pa kritere dhe jashtëligjore. E, në shumicën e tyre, qeveria Kurti, për t’i rrënuar bordet e ndërmarrjeve publike, duhet t’i ndryshojë ligjet në fuqi.

 

Megjithatë, Kurti ka vendosur t’i punësojë militantët partiakë, të cilëve u ka premtuar se do i sjellë nëpër pozita dhe le të dalë ku të dalë.

 

Aktualisht, ai ka gjetur një shpjegim për punësimet nepotiste:

 

“Nëse ka ndonjë rast individual të ndonjë lidhje të ndokujt, kjo nuk është bërë për shkak që e ka atë lidhje familjare, por bëhet fjalë për një profesionist të spikatur”.

 

Shtrohet pyetja: Kush i ka vlerësuar dhe kush po i vlerëson ata se janë profesionistë të spikatur? Apo këtë “spikatje” po e sheh vetëm Albin Kurti?

 

Sepse, kur LDK-ja dhe PDK-ja i punësonin   partiakët, të paktën, nuk flisnin publikisht, meqë ndiheshin sado pak të turpëruar për nepotizëm  institucional që bënin.

 

E, Kurti po i mbron punësimet farefisnore, në kundërshtim me politikat e deklaruara derisa ishte në opozitë se pushtetarët i punësonin kushërirat, tezet, baxhanakët dhe të tjerë…

 

Shtrohet pyetja tjetër: A ka ndryshuar Kurti i opozitës tash që është në pozitë?

 

Dhe, po të analizohet më në hollësi arsyetimi i tij se “ata që punësohen janë profesionistë të spikatur”, shihet qartë se ka gjetur një modus për t’i arsyetuar punësimet që po i bën në baza partiake…

 

Sidoqoftë, në Kosovë është njëfarë tradite e pushteteve:

 

Pas komunizmit erdhi Ibrahim Rugova dhe qëndroi më shumë se dhjetë vjet në pushtet.

 

Dhe, pas Rugovës në pushtet erdhi Hashim Thaçi gati 20 vjet.

 

Pas Thaçit tash, në pushtet, ndodhet Kurti, e që nuk dihet sa vjet do të vazhdojë të qeverisë.

 

E, kush do të vjen pas Kurtit, nuk dihet, por dikush, pa dyshim, po.

Por, a do të ndalen ndonjëherë punësimet në baza partiake në Kosovë, kjo nuk dihet… Safet Krivaça /Kosovarja/