Më 17 korrik të këtij viti, Kosova kishte regjistruar vetëm 2 raste të reja të infektuara me COVID-19, raporton Gazeta Express.
Asnjë viktimë nuk ishte regjistruar më 17 korrik, derisa po atë ditë ishin shëruar nga virusi 3 persona.
Një muaj pas, situata me pandeminë ka marrë një kthesë krejt tjetër.
Varianti Delta i COVID-19 duket se ka nisur të bëj ‘kërdi’ në vend.
Ndërsa, rekorde të numrit të rasteve të reja të infektuara po vazhdojnë të thehen.
Sot Kosova ka regjistruar 1 mijë e 765 raste të reja të infektuara me koronavirus, shifra më e lartë e regjistruar deri tani.
Po ashtu, vendi ka regjistruar edhe 5 viktima si pasojë e këtij virusi.
Komuna që ka regjistruar më së shumti raste të reja të infektuara është ajo e Prishtinës me gjithsej 400 raste, pastaj Komuna e Gjilanit me 158 raste, Ferizaj me 138 raste, Gjakova me 117 raste dhe Peja me 103 raste.
Me rritjen e numrit të rasteve të reja të infektuara me COVID-19 është rritur edhe numri i rasteve aktive me këtë virus.
10 mijë e 183 raste janë aktualisht aktive me virus në vend.
Kujtojmë që Ministria e Shëndetësisë kishte bërë të ditur se deri në 80 për qind e rasteve të infektuara me virus janë me variantin Delta.
Ndërsa, nga kjo ministri dhe nga Instituti Kombëtar i Shëndetit Publik u kanë bërë thirrje qytetarëve që sa më shpejtë të vaksinohen kundër COVID-19 në mënyrë që të mbrohen nga virusi